निर्वाचन आयोगमा गत माघ महिनाभित्र ८८ राजनीतिक दलहरुले आर्थिक वर्ष २०८०/८१ को लेखा परीक्षण प्रतिवेदन बुझाएका छन् । दलहरुले आयोगमा बुझाएको विवरण अनुसार सबैभन्दा धनी दल नेकपा (एमाले) देखिएको छ ।
एमालेले १४.७९ करोड आम्दानी गरेर ७.८५ करोड खर्च गर्दा ६.९३ करोड बचत गरेको छ । एमालेको मुख्य आम्दानी स्रोत पार्टी सदस्यता शुल्क हो, जसबाट ११.५४ करोड संकलन भएको देखिएको छ ।
नेपाली कांग्रेसले २.५९ करोड आम्दानी गरे पनि ४.९१ करोड खर्च गरी २.३२ करोड घाटामा रहेको छ । नेपाली कांग्रेसको प्रमुख आम्दानी स्रोत चन्दा हो ।
त्यस्तै नेकपा माओवादी केन्द्र १.८६ करोड आम्दानी गर्दै २,४४४ रुपैयाँ घाटामा रहेको छ भने रास्वपा ३.७९ करोड आम्दानी गरे पनि ६.५० करोड खर्च गरी २.७० करोड घाटामा छ । एकीकृत समाजवादी ४.२४ करोड आम्दानीका साथै ३२.८७ लाख घाटामा देखिएको छ।
जनमत पार्टी पनि २९,३९० रुपैयाँ घाटामा रहेको छ । ११५ दलमध्ये ८८ दलहरूले निर्वाचन आयोगमा आय-व्यय विवरण बुझाए पनि केहीले विवरण नबुझाएको देखिन्छ ।
